BSNL இல் உள்ள ஊழியர் மற்றும் அதிகாரிகள் சங்கங்களின் பொதுச் செயலாளர்கள் மற்றும் பிரதிநிதிகள் கலந்து கொண்ட கடந்த கூட்டத்தில் முடிவெடுத்தபடி, 25.11.2025 அன்று, CMD BSNL உடன் ஒரு சந்திப்பு நடைபெற்றது. DIRECTOR (HR) மற்றும் PGM (ESTT) ஆகியோரும் உடன் இருந்தனர். துவக்கத்தில், அமைப்பாளர் தோழர் அனிமேஷ் மித்ரா, மனிதவளப் பிரச்சனைகளில் நிர்வாகத்தின் மாற்றாந்தாய் மனப்போக்கையும், ஊதிய மாற்ற ஒப்பந்தத்தை நிர்வாக குழுவிற்கு முன் வைப்பதில், அதீத காலதாமதம் தொடர்பாகவும், அனைத்து சங்கங்களின் வருத்தங்களை தெரிவித்தார். அதன்பின், அனைத்து சங்கங்களின் பொதுச்செயலாளர்களும், நிர்வாகத்தின் தேவையற்ற காலதாமதம் செய்யும் அணுகுமுறையின் மீது, தங்களின் வருத்தங்களை தெரிவித்தனர். அதற்கு பதில் அளித்த CMD BSNL, நிதி பிரிவு எழுப்பி உள்ள ஆட்சேபனைகளுக்கு தீர்வு கண்டு, அடுத்த நிர்வாக குழு கூட்டத்தில், முன்மொழிவு வைப்பதற்கு தேவையான நடவடிக்கைகள் எடுக்கப்படும் என உறுதியளித்தார்.
ஊழியர்கள் மற்றும் அதிகாரிகளின் மனித வள பிரச்சனைகளுக்கு தீர்வு காண்பதில், மந்தமான நிலை உள்ளதை சுட்டிக்காட்டி, தங்களின் அதிருப்தியை, FORUM தலைவர்கள் தெரிவித்தனர். விவாதத்தின் போது தலைவர்கள், தமிழ்நாடு மற்றும் சென்னை மாநிலங்களில் உள்ள பிரச்சனைகளை நிர்வாகம் கையாளும் முறையை, கடுமையாக விமர்சித்தனர். இதற்கு பதிலளித்த CMD BSNL, ஊழியர் மற்றும் அதிகாரிகளின், முக்கியமான மனிதவளப் பிரச்சனைகளை தனித்தனியாக பட்டியலிட்டு, பேச்சுவார்த்தையின் மூலம் நிர்வாகம் தீர்வு காண, உரிய நடவடிக்கைகள் மேற்கொள்ளப்படும் என தெரிவித்தார்.
தோழர் அனிமேஷ் மித்ரா, GS., BSNLEU